казка для дзяцей і дарослых
частка IV

НА ПАЎДНЁВЫМ ПОЛЮСЕ

Вось ужо два дні ляцелі.
Рэкі, горы, гарады
Адно хутка мільгацелі
І знікалі ў нікуды.

Зноў вялікім белым полем
Стала ўсё ўдалечыні.
Ужо цяпер Паўднёвы Полюс
Паказаўся на зямлі.

Анікога ў белым полі,
Толькі вецер снег мяце.
Пачалі шукаць паволі,
Дзед Мароз схаваўся дзе?

Тут туман закалыхаўся,
І сярод белых ільдзін
Нечакана паказаўся
Чорна-беленькі пінгвін:

– Вас усіх, сябры, вітаю!
У дазоры тут стаю.
Ад бяды абараняю
Антарктыду я сваю.

Ды навошта вы на Полюс
Прыляцелі ў гэты час?
Што шукаеце ў полі?
Хто патрэбны вам ад нас?

Тут Снягурка ў хваляванні
Выйшла, руку падняла.
Тэлеграмы ліст з кішэні
Вартавому аддала:

– Называюся Снягуркай.
Гэта ўсё – мае сябры.
Яны з Пушчы Белавежскай
Неслі вам свае дары.

Ужо каторы дзень лятаем.
Дзед Мароз патрэбны нам.
Мы яго не адшукаем,
Хоць былі і тут, і там.

Паглядзеўшы ў тэлеграму,
Аж падскочыў той пінгвін:
– Дзед Мароз тут добра знаны!
Пойдзем разам мы за ім!

Тэлеграму вы чыталі?
У нас прачнуўся злы Вулкан!
Злыя Сілы загадалі,
Каб нагрэў ён акіян.

Вунь далёка айсберг дзіўны
Горб падняў аж да нябёс.
Там сабраліся пінгвіны,
З імі разам Дзед Мароз.

Ад учора дэбатуюць.
Бо Вялікі там Савет.
Усе пінгвіны лямантуюць!
Як пазбавіцца ад бед?

частка V
ВЯЛІКАЯ БІТВА

Да агромністай ільдзіны
Іх прывёў паспешны крок.
Вельмі дзіўная карціна
Разгарнулася здалёк.

Каля айсберга трашчала,
Ды мігала глыбіня,
Усё навокал грукатала,
Калыхалася зямля.

Дзед Мароз – Вялікі Волат
Над зямлёю паўставаў.
І мароз, і люты холад
Да сябе ён заклікаў:

– Гэй, магутны Холад зімні!
Накіруйся ў акіян!
Скуй ізноў усе ільдзіны!
Затушы на дне Вулкан!

Сваім кіем бліскавіцы
У акіян ён стаў пускаць
І расталую вадзіцу
Зноўку ў лёд ператвараць.

Моцна скрыгаталі крыгі.
З глыбіні праз акіян
Лавы вогненныя прыскі
Вывяргаў уверх Вулкан.

Айсберг распачаў хіліцца,
Падымалася вада,
Нават снег пачаў дыміцца,
Узмацнялася бяда!

Глянуў Дзед Мароз наўкола,
Кій магічны зноў узняў,
І на ўвесь магутны голас
Гучна-гучна пракрычаў:

– Гэй, Зямля, мая сястрыца!
Акіян, ты братка мой!
Мне дапамажыце біцца
З гэтай страшнаю бядой!

Трэба разам пастарацца,
Бок аб бок паваяваць!
Усім светам аб’яднацца
Ды жыццё ўратаваць!

працяг будзе…