Мой тыдзень

info@stihi.by

Панядзелак – дзень сумотны,
Доўгі ён, цяжкі, маркотны.
Мы не хочам працаваць,
Толькі пагуляць – і спаць.

Вось аўторак зусім іншы,
Можна пагартаць і кніжку,
Нешта добрае зрабіць,
Нават з татам цвік забіць.

У сераду настрой сярэдні,
Лепшы дзень быў папярэдні.
Многа задалі вучыць,
Як жа ўсё перарабіць?

Вось чацвер – другая справа,
Хутка пятніца-забава.
Весялей гляджу на свет,
Канец тыдня, не сакрэт.

А ў пятніцу – лагода!
Часу вольнага як многа!
Урокаў рыхтаваць не трэба,
Гуляй смела ад абеду!

А нарэшце – выхадныя!
Вось дзянёчкі залатыя!
Хочаш – спі, гуляй, малюй
Ці на вуліцы гарцуй!

Толькі вось адно шкада –
Заўтра ў школу зноў пара.
Не паспеў я на спатканне,
Трэба рыхтаваць заданне.