Над Гуйкаю спяваюць салаўі…

info@stihi.by

Над Гуйкаю спяваюць салаўі…
Халодная вясна не перашкода.
То мы незадаволены пагодай,
А ім утульна ноччу ў галлі.

Ільецца ў спальню песня праз акно,
Малодзіць сэрца, раскрывае душу.
Пра сон забыць да раніцы я мушу,
У думках зноў зʼяўляецца адно:

Што шчасце ў кароценькіх імгненнях,
Калі паміж штодзённай таўкатні
Ты не зважаеш, як праходзяць дні,
Ды раптам учуеш гэтае стварэнне

І зразумееш — проста ўсё. Уяві,
Жывеш, як салавей заве каханку.
І я не сплю. Я слухаю. Да ранку
Над Гуйкаю спяваюць салаўі…
14.05.2025